चैत १५
नेपालले एएफसी महिला एशियन कप २०२६ को छनोटमा आफ्नो समूह चरणको पहिलो खेल लाओससँग खेल्ने भएको छ। एशियाली फुटबल महासङ्घ एएफसी ले सार्वजनिक गरेको खेलतालिका अनुसार नेपाल र लाओस बीचको खेल आउँदो जुन २९ मा हुनेछ।
नेपालले दोस्रो खेल २ जुलाईमा श्रीलङ्कासँग र तेस्रो तथा अन्तिम खेल ५ जुलाईमा उज्बेकिस्तानसँग खेल्ने तालिका छ। नेपाल समूह ‘एफ’ मा परेको छ, जसको खेल उज्बेकिस्तानमा हुनेछ। फिफा वरीयतामा उज्बेकिस्तान नेपालभन्दा निकै अघि रहेको छ, जहाँ उज्बेकिस्तान ५०औं, नेपाल ९९औं, लाओस १०७औं र श्रीलंका १५८औं स्थानमा छन्।
महिला एशियन कप छनोटमा ३४ वटा टोलीलाई ८ समूहमा विभाजन गरिएको छ। हरेक समूहका विजेताले आगामी वर्षको मार्चमा अस्ट्रेलियामा हुने एशियन कपमा स्थान प्राप्त गर्नेछन्। यस प्रतियोगितामा अस्ट्रेलिया, चीन, दक्षिण कोरिया र जापान भने पहिले नै छनोट भइसकेका छन्। एशियन कपमा कुल १२ टोली सहभागी हुनेछन्।
